外圍股市昨日表現平平無奇，但港股紅盤就開得甚靚仔，恒指全日升225點，收報「一於發到加零一」（12801），認真好意頭。阿虎重以為做完03年櫥窗粉飾，今日紅盤應該唔會太過大紅大紫，所以噚日港股走勢實在令人喜出望外，特別是國企指數剛上破5000大關後，竟然連氣都唔使唞，再衝多342點，收報5363，升幅高達6.83％，大戶將中石油（857）及中石化（386）兩大重磅股當二三線股咁炒高近9％及逾10％。
黑客話，呢一轉國企升浪應該會升至春節假期左右，才會唞氣，買咗貨嘅散戶可以繼續持有等過肥猴年。
銀建國際（171）宣布一名股東手貨覓得新主後，股價再升19％至1.69元，短期暫時受制於1.71元，不過以噚日成交達到1.8億元，動力之強，相信可輕易破關再上。銀建國際主要股東CIIChongqing（BVI）於上周二沽出7397.2萬股，其中6500萬股在場外以每股１元沽畀一位獨立第三者，雖然新股東身份未曝光，但淨係睇銀建個勢就知道股份已落入強者手上。
中油（135）又傳私有化，股價炒高5.26％，收報1.40元，成交達1.93億元。其實此股久唔久都會傳出私有化消息，至於邊一次至係堅料，阿虎都無Idea，不過Cookie話今次傳到似層層咁喎，但到𠵱家都未傳出每股收購價有幾多。
其實𠵱家石油股炒到㷫烚烚，喺呢個時提出私有化，成功機會有幾高大家都心中有數啦。
阿 虎