新一年啱啱開始，代理行已滿肚擴張大計。香港置業今年計劃開多二十間分行，由𠵱家二十六間分行，加到四十六間。
董事胡日發話，落腳重點係新界區同埋將軍澳區，但仍會緊守港置重要基地嘅西九龍。噚日港置喺大角嘴維港灣開咗今年第一間分行。美聯集團主席黃建業寄語一句：希望「將港置今年Size翻一番」。胡董就話，原定花費一千萬做擴張，但市道轉好，投資額不設上限咁話。配合擴張大計，重會增聘三百人迎接升市。
黃主席認為今年樓市「單位愈大愈好賣」，尤其部份豪宅地區，南區、山頂同中半山，有缺貨情況，所以今年特別看好豪宅。黃主席話自己向來鍾意買樓收租，重親口透露元旦日用咗逾二千萬買咗南山別墅十七號。不過，佢話洽購嘅十個何文田君頤峰單位，𠵱家仍未傾成。
中央繼續放寬內地自由行嘅限制，代理行瞄準呢班大客，加強前線員工講普通話嘅能力。利嘉閣就同香港普通話學研社合辦「地產代理普通話課程」，幫員工補習速成。
呢個課程共分九節，每節兩個鐘，內容圍繞地產代理日常要用到嘅詞彙，咁至可以同自由行旅客溝通到。課程亦包括利記嘅背景介紹，免得俾個客問到口啞啞。
據聞前政務司司長陳方安生，同金管局總裁任志剛都曾經喺呢間學研社學普通話。
聖誕節同元旦啱啱過去，商場大業主已經急不及待再為商場大變身，迎接另一個零售黃金檔期農曆新年。
太古地產嘅重點商場鰂魚涌太古城商場，以「靈猴」做布置主題，一樓有「靈猴送壽」，二樓有「水簾洞」。重會請廣州雜技團嚟表演賀歲。
新地嘅中環國際金融中心二期商場，擺放巨型繩結，外形似錢幣，寓意財源滾滾。
至於地鐵旗下四個商場請嚟粵劇藝人蓋鳴暉做嘉賓。
蘭西
電郵地址：