警方昨日派出軍裝警員在殯儀館和岑建勳、施南生等開會，討論梅艷芳喪禮之安排，岑建勳透露本月十一日公祭時，估計到場人數會比張國榮公祭時還多，但警方暫無封路安排，岑建勳說：「因為想大家都可以見到梅姐。」
岑建勳和施南生昨日在殯儀館為了梅艷芳喪禮之事和警方開會。昨午三時許，有六位穿着制服的警察到達殯儀館，岑建勳會後透露本月十一日設靈當日將會有公祭。
岑建勳和警方開完會後說：「我哋同警方溝通得好好，到時唔會封路，因為想大家都可以見到梅姐，但會喺殯儀館對面嘅渣華道遊樂場安排兩個等候區，四點鐘開始公祭，𠵱家暫時估計唔到人數，但諗會比張國榮嗰日更多，因為張國榮公祭嗰日有沙士、落雨兼且係夜晚，而十一號重係星期日，所以會安排得更加細緻。」
問警方到時會派多少人手到場，岑建勳說：「咁我又冇問，不過我哋自己會安排多啲人喺現場幫手。」
一向負責藝人保安的StanleyTeam保安公司老闆Stanley，昨日五時許和警方一起在渣華道遊樂場視察。
據在場警員說：「𠵱家未知人手安排，視乎會有幾多傳媒同fans到場，先至決定封唔封路，𠵱家距離十一號重有一段時間，我哋會再開會先作決定。」
此外，岑建勳昨晚在九龍塘開完治喪委員會會議後，他說：「重未定到扶靈名單，因為有啲朋友唔喺香港，聽日後日或者有公布。」
對於梅媽離開時表示滿意喪禮安排，岑建勳說：「朋友都做得好辛苦，佢應該滿意。」岑建勳表示阿梅的遺照已揀定，說完便匆匆上的士離開。
採訪：林妙萍
攝影：陳慧安
