房委會分拆旗下嘅一百萬平方米商場及十萬個停車位上市嘅工作進行得如火如荼，但係有啲嘢唔急得，要畀時間嗰三個全球協調人滙豐證券、瑞銀華寶同埋高盛去做嘢。
為咗配合間新公司成立，房委會搵咗獵頭公司，今日會登廣告，實行全球物色新公司嘅CEO，知情人士話，呢份工有幾多人工唔會寫出嚟，但係大家都心中有數，房委會話過想套現二百億喎，咁就可以知道間新公司嘅規模係幾咁大啦，個CEO點都唔可能太cheap啩，各位想知道有關詳情就真係要買張Post嚟睇吓。
踏入○四年第一個交易日，股市又繼續升，樓市間接受惠，好多人將喺股市賺到嘅錢去執平樓。
樓市有救，就即係孫公有運行，除咗阿董個「紅鬚軍師」，大家都唔想個樓市死，至於房委會，就更加想個市旺，盡快甩咗手上批居屋。
傳真︰2623-9278
電郵︰