元旦大遊行，係咁意又有十萬港人走上街，老董好難唔眉頭皺，八方都戥佢悽涼，特首呢份工認真難打。
香港人實在值得表揚，次次遊行都好守規矩，大會主持人企喺政府總部叫大家唔好停留，人人都好聽話，想同司徒華同劉千石兩位民主老大哥打招呼嘅市民老遠揮揮手，已經心滿意足。
華叔同八方講，今次佢老人家狀態甚佳，行畢全程都唔覺辛苦，對於啲市民咁自發性上街，佢都好感動。講講吓，提起梅艷芳，大家都欷歔不已。回想八九民運期間，華叔、阿石同梅艷芳不單止拍檔搞「民主歌聲獻中華」，阿梅重曾經同華叔到美加巡迴演出，為當地民運組織籌款。
之後梅艷芳開演唱會，華叔同阿石都有捧場，阿梅邀請華叔上台獻唱，係佢首次演唱，「咪唱《龍的傳人》囉」，華叔一邊講，一邊回憶，就好似講緊噚日發生嘅事咁。到阿梅生日，華叔都有同佢慶祝，重第一次去唱卡拉OK㖭，所以特別記得清楚。
之後幾年，阿梅、劉天蘭同岑建勳佢哋年年「六四」都有去維園，坐喺前排參加晚會，近年先至少見咗。想當年喺跑馬地舉行嘅「民主歌聲獻中華」，八方重係電視台前線記者，喺北京接受蘇凌峯現場訪問，事隔十多年，卻記憶猶新。
華叔同阿石齊聲話阿梅份人好值得尊重，所以一定會去追思會。唉，天妒紅顏，奈何！
傳真︰2623-9278
電郵︰