新車速報：<br>凌志ES300質優價更抵

新車速報：
凌志ES300質優價更抵

響經濟低迷情況下仍不乏捧場客，被視為高品味汽車品牌嘅凌志（Lexus），早前代理以超值價限量發售一款ES300豪華版，瞬即惹來車迷好大反應，更出現供不應求嘅現象；究竟呢款車有甚麼過人之處呢？今日就等我哋一齊嚟睇吓啦！

記者、部份攝影：陳偉林

呢款凌志ES300型號，有別同系其他車款，主要針對中價嘅高級轎車市場，造型既出眾之餘，車廂設備亦見講究，一直不乏識貨用家欣賞。

外形獨到有品味
及至呢一代，新車賣相更變得趨時獨特，予人品味突出之餘，炯炯有神嘅大燈及霧燈組合，加埋四輪跑車化胎軨配搭，富活力嘅氣派，望落又真係幾有吸引力噃！

■Xenon頭燈連霧燈組合，明亮又奪目。

■改配四輪16吋跑車合金胎軨，倍見有動感。

配套豪華又講究
再者，凌志車系內裏嘅出眾隔音設備，加上一套高級6碟CD音響，前後獨立送風嘅恒溫冷氣，置身其中嘅上乘皮椅，一份愜意嘅舒適感，即時油然而生；還有，設備除電窗、電鏡，以及前後獨立房燈外，又有尾玻璃遮陽簾，配套都可算係一絲不苟呢！

■整個座艙陳設一絲不苟，盡現有高級轎車氣量。

■新車沿用一台3.0公升V6偈及5前速自動波，演繹出寧靜有力一面。

■一體式中控台上有齊多碟式高級CD音響，又有恒溫冷氣配搭。

■前後兩排原廠高級皮椅，乘坐貼服之餘，前排重置有全方位電控調校。

3.0公升V6偈演繹出眾
新車除予人舒適感外，一台3.0公升V6偈嘅表現，亦教人柔韌有力，起跑加速固然剛勁充滿動感，而一套5前速自動波嘅順滑反應，更可謂功不可沒，加埋四輪富支持力又不失舒適感嘅懸掛結構，可算係完全切合一部高級轎車應有身份㖭！

■尾玻璃備有電動遮陽簾，好有大轎車氣派。

■三個獨立液晶圓表組合，資料豐富編排井然。

記者評語：乘坐舒適代步一流
早前，代理方面以極吸引嘅價錢推售，即時賣個滿堂紅，定單接踵而來；新車無論外形及車廂陳設，同樣講究又舒適，加上凌志嘅品牌效應，以及一台3.0公升V6偈慳油好力嘅表現，作為日常代步座駕，委實合適不過之餘又見超值。

凌志ES300豪華版小檔案
引擎：2995ccV6DOHC
馬力：212ps/5800rpm
扭力：30.4kgm/4400rpm
尺碼：4855×1810×1455mm
軸距：2720mm；車重：1565-1590kg
新車售價：$309,000
車輛提供：皇冠汽車（25119430）

■前排之間除備有雙層儲物匣，兼且重有伸縮杯座。

■一套5前速自動波，檔位明確又見反應暢順。