昨日講讀數學系，數學教師讀者李認為冇用，左丁山認為不可一概而論，學生有天份嘅話，要多加鼓勵，冇天份就千祈唔好谷咯。點解咁樣講呢？記得左丁山讀大學一年班，數學系一年級梗有十幾人，但數學系四年級幾乎年年得四個學生。到咗第二年，數學系學生紛紛轉系，改讀經濟、工管，二年班得番四位學生。左丁山見到其中兩位日日鋤書，幾乎喺拉記（library）賴死唔肯走咁滯，勤力到左丁山為之肅然起敬；另外兩位就同我哋啲「容易系」學生日日踎canteen打橋牌、吹水。好嘞，到後來畢業成績公布，兩位唔多似讀書嘅就考二級榮譽中等，兩位搏晒命嘅，只係得三級榮譽。再睇番數學系前兩屆成績，一位橋牌高手，一位足球健將，都係成績好好嘅。
讀數學系可以讀，但如果一入大學一年班就覺得好辛苦，日鋤夜鋤都追唔上嗰位嘻笑度日嘅同學嘅話，就唔好堅持嘞，轉系好過！不過現在不比以前，理科成績好嘅學生就讀晒啲容易系（工管、會計），恐怕轉唔到系噃，所以最好撫心自問，請中學數學老師老老實實評估自己：有冇數學天份先，中學數學叻，入到大學方知完全唔係嗰回事！
大概目前香港唔係咁多學生會揀選數學系，睇報紙知道理大最多人申請嘅係社工系，六十人爭一個學額，社工出路唔算好，志願機構紛紛咳筆直，點解重有咁多學生對社工系有興趣，左丁山真係落後於形勢，不明所以，得閒要請教吓啲教授先至得。