二○○三年唔開心嘅新聞不絕於耳，踏入新嘅一年，率先有個好消息喇，就係結婚差唔多有四年嘅楊受成二女楊黛思傳出有喜，除夕晚佢重大住個肚喺細佬楊其龍間Dragon-i倒數過年㖭，總算係新一年嘅一個好開始。
馮仁昭噚日打電話恭喜佢，佢都話陀第一胎心情好緊張，懷孕初期重嘔得好犀利㖭，佢話：「家姐（楊諾思）生咗咁多個，佢以過來人經驗話畀我聽嘔係好自然嘅。日日嘔，去邊都唔得，我諗過咗呢個階段我會出吓街買定啲BB衫。」
楊黛思重話：「我同老公都決定唔止生一個，所以頭一胎係仔係女都冇所謂，BB個名就會跟番老公屋企嘅族譜嚟改，我宣布咗有咗BB呢個消息畀屋企人知後，全家都喜氣洋洋，話呢個馬騮BB係最好嘅新年禮物。」
楊思琦同蔡子健噚日喺將軍澳電視廣播城，為新劇《鴨寮下的金蛋》着婚紗。思琦同李家鼎個仔李永豪都拍咗拖一段日子，佢話覺得咁快諗結婚唔係咁好。身旁嘅子健話幫佢打電話問吓，思琦就好奇怪咁問：「你識佢咩？」子健就笑笑口話識佢老竇李家鼎，其實思琦已經俾人影到佢喺男方屋企留宿好多次，施明都當正佢係新抱啦！
趙頌茹（阿Yu）噚日喺金鐘嘅「環球嘉年華」內舉行簽名會，阿Yu話從來都冇男仔帶佢去遊樂場玩，講到好似好可憐咁。而原來佢一直最心儀嘅男人就係劉德華，佢更加當華仔係神咁樣，絕對係「只可遠觀，不可褻玩」。嘩！講到咁緊要，唔知畀佢見到華仔嘅話，會唔會行近啲都暈低呢？
羅莽噚日喺將軍澳電視廣播城為今晚舉行嘅《慈善星輝仁濟夜》綵排，見佢又同四驅車鬥力、又拉雙層巴士，呢兩項表演原本係由吳剛表演嘅，監製話臨時收到吳剛通知，原來佢為咗增加難度，自行修改用牙拉車，所以拉傷咗條頸椎，𠵱家要搵羅莽頂替。
喺日本大紅嘅內地女子樂團，女子十二樂坊將會喺十六同十七號兩晚，喺紅館舉行兩場音樂會，因為反應好，兩個禮拜啲飛就差唔多賣晒，所以會加開十八號第三場，陳慧琳已經應承咗做音樂會嘅嘉賓，估唔到女子十二樂坊喺日本受歡迎到上埋《紅白》，嚟到香港都照樣咁掂，呢班女仔真係有啲計呀！
