綽號「飛天朱」嘅立法會議員朱幼麟，噚日新年元旦，實行以自己嘅強項，揹住個五十磅重嘅滑翔傘，爬上石澳「龍脊」山頭。企喺斜坡，打開個傘，話要隨風飛上天，祝願二○○四年香港再起飛。
着住件台灣製造嘅飛行衣，心口貼上五星旗嘅朱幼麟話，「香港已經跌到落谷底，低到唔可以再低，真係要再次起飛。」但係佢認為，香港今年經濟復甦嘅速度唔會太快。
噚日嘅天氣，唔止視野朦朧，石澳山頭重吹起十級風。唔少行山市民，睇見「飛天朱」玩滑翔傘，都冒住強風等睇佢點飛上天。飛天朱睇見咁多市民畀面，話唔衰得，打幾次電話去天文台問風速。原本諗住十一點起飛，點知等足兩個鐘，風速先減低至六級。飛天朱急不及待，想一飛沖天，點知被強風吹到差啲撞山，但最終都有驚無險，唔止飛上天，重打開支香港特區旗，同為他打氣嘅市民揮揮手。
傳真︰2623-9278
電郵︰