韓君婷將會喺聽晚演出《慈善星輝仁濟夜》，今次佢會為善事搏晒命，同許志安合力表演「志擊心口碎火冰」，極為驚險。前幾日佢為項目綵排，俾一塊六吋厚嘅巨型冰塊壓住個身，頭戴一個安全頭盔，俾咁重嘅冰壓住嘅韓君婷話：「都幾重，但都接受到。」
正式演出嗰陣，許志安會用大鎚擊碎放喺韓君婷心口上面嘅冰塊，而冰塊上面會點着火。就𠵱家所知，項目至少會籌得約五十萬善款。不過面對住熊熊嘅火光，兼且放個巨型冰塊喺心口度，然後俾個大鎚一嘢打落嚟，真係幾危險，所以韓君婷都好緊張話：「我已經買齊晒保險，不過冇特別買心口，因為我覺得個樣緊要啲，始終都要出鏡。」
馮仁昭就覺得安仔表現破冰嗰陣應該小心啲，搞到人哋破相就唔好啦，唔通養人哋一世咩？
新城日前被傳大裁員，搞到人心惶惶，前晚新城娛樂台台長朱明銳就再次澄清絕冇大裁員，只係裁咗四個員工，同埋調整DJ嘅薪酬，佢重代行政總裁甘國亮話報館遲啲可能會繼續收到匿名信指摘新城，又話啲信所講嘅內容就絕唔係事實。馮仁昭真係羨慕新城高層，竟然擁有未卜先知嘅能力，連未發生嘅事都回應咗先。
滕麗名噚日為電視劇拍外景，因為陳錦鴻遲到嘅關係，所以就拍咗滕麗名先，劇入面講陳錦鴻係性無能，滕麗名諗住激發起佢嘅雄風，噚日滕麗名着住背心短裙同埋魚網絲襪畀記者影相，引咗唔少人眼望望，滕麗名都有啲尷尬，佢話：「遲啲我重會同陳錦鴻有好多kiss戲㖭。」咁大個靚女引誘你，陳錦鴻唔好番先奇啦！
薛家燕前晚喺澳門出席倒數活動，家燕姐憶起多年前一個梅艷芳有份參加嘅節目，家燕姐話：「以前有個節目，當時阿梅兩姊妹十一、二歲，重唱《香夭》，嗰時已覺得佢好專業，同其他人唔同，係一名天才，所以我𠵱家好想搵番嗰盒錄影帶，好有紀念價值。」梅艷芳咁細個已經識唱咁嘅歌，都可以話佢注定做天后。
陳彥行同苑瓊丹前晚去到澳門做倒數特備節目，行姐着咗一件絲質嘅喱士裙現身，感覺有啲似睡衣，記者想邀請行姐影相時，旁邊嘅苑瓊丹即好抵死咁教行姐要點樣擺甫士先夠吸引，行姐當然唔得閒同佢癲啦。咁又係，人哋行姐話晒都係斯文一族，邊學似苑瓊丹咁不顧儀態先得㗎！
