我羅拉慶祝完○四年嘅來臨，噚日就同班閨中密友傾開日本啲女星穿衣品味愈嚟愈參差，講到興起，所以今日同大家溫故知新，順便預測一下今年嘅騎呢大趨勢。
我羅拉睇過佐藤江梨子同Gackt拍嘅美容廣告後，都知佢身材好perfect，但佢都唔使上下都咁迫爆啩？與其係咁不如唔着！佐藤為搶鏡唔着底褲上台，真係要歎句搵食艱難。
靚太黑木瞳每次出現都好明豔照人，嗰次佢着全身LV新裝出席一個首映時依舊好後生好潮。不過可能黑木瞳唔記得嗰個係高台，着錯咗條迷你裙，見到佢強顏歡笑個樣，都知佢驚走光。
叶姊妹呢兩個奇人，無論去見日本天皇定係企街食拉麵，相信都可以着住件接近冇布嘅衫。我羅拉都知現今女藝人去親公開場合都會打底，但要學到叶恭子咁，吓吓露到底線又唔會穿崩嘅，睇怕冇番四、五十年功力都唔掂。
唔少女歌手都鍾意喺舞台上着婚紗，天后濱崎步都唔例外，永遠要勝人一籌嘅佢，重要着條成百米長嘅婚紗，威就畀佢攞盡啦，難為喺後面捧紗嘅十幾個dancer咋！
相信大家見到藤原紀香呢個地產廣告公司嘅造型後，同我羅拉嘅感受一樣：佢真係淪落啦！紀香十足將成幢樓擺喺個身度，同掛個廣告牌企喺街度嗰啲冇分別。如果紀香重係當日收七千萬日圓、即係成五百萬港紙嘅廣告女王，咁嘅look真係千年道行一朝喪。
由Morning娘同同門姊妹分拆出嚟嘅Minimoni一向係日本小朋友嘅至愛，加入高橋愛嘅新一代Minimoni，打扮十足卡通人物，尤其係佢哋孭埋個透明書包加一大袋文具，相信唔少細路都想咁yeah返學。