鄭伊健最愛在冬季穿皮褸示人，由短褸至長褸，牛皮至猄皮，多年來共收藏了五十件不同顏色的皮褸，他最喜歡以皮褸襯牛仔褲，平凡中更見型格。
身形高大的鄭伊健天生是一個皮褸好衣架，各種不同款式的皮褸，伊健都可以將其優點展示人前，其實由他拍攝電影《古惑仔》開始，已見伊健穿上西裝款皮褸，當年更曾掀一陣熱潮。
不過伊健近年開始穿着其他款式的皮褸，好像一些較casual的款式，他近日更愛杏、啡色猄皮褸配襯牛仔褲，平凡中更見型格。
伊健謂一件靚皮褸絕不便宜，他喜歡在世界各地搜購不同款式的皮褸，現共有五十件珍藏，他表示只要打理得宜，一件皮褸可以穿上很多年，所以亦有其價值，伊健說：「我覺得皮褸係好永恒嘅打扮，其實服裝嘅潮流，每隔一段時間會返轉頭，所以唔同款嘅舊皮褸我都會留番，遲啲實興番㗎！」
一般人最怕就是打理及存放皮褸的問題，伊健便教大家打理皮褸的方法，他說：「其實打理皮褸真係唔容易，要存放喺一定嘅室溫，太乾燥或太潮濕對皮褸都唔好，太乾會令皮裂開，太濕嘅話，好易令猄皮發霉，因為我有個朋友開洗衣舖，所以全部衫都係佢幫我打理，連存放嘅地方都幫我搞掂埋！」
採訪：卓美娟
