話咁快已經踏入04年，好多人都會趁新一年換番部新手機，不過除睇樣同功能外，原來12星座對選擇手機亦有直接影響。而今年三大當旺星座就係獅子座、處女座同天蠍座，換新機就更加唔可以求求其其，其他星座亦想知咩機啱自己？睇睇以下介紹就包冇錯！
記者：劉耀祥 攝影：陳陶鈞
ImageGirl：Cody
人緣運於04年大好嘅獅子座，直接幫助事業上嘅運勢，尤其獅子座係天生就係領導人格，加上熱情開朗同正直嘅個性，朋友真係斷「打」咁計，不過就係因為朋友太多，應酬花費都會直線上升，想儲錢就未必係最佳時機，所以獅子座嘅用家揀手機就梗係要功能夠多，外形又靚仔先得，而SonyEricssonP900就啱晒獅子座嘅用家，唔單止可以儲齊所有朋友電話號碼，就連電郵、公司電話同屋企電話都冇問題，兼且重可以得閒上網玩《ICQ》，實行同朋友日Chat夜Chat！
P900$5,688
大量機會湧埋身係今年處女座面對嘅事情，尤其喺工作上更加機會不斷，可以話係豬籠入水嘅一年，以往辛勞終於都有成果。不擅理財係處女座嘅弱點，對於事事追求完美嘅處女座，得到財富但就增加自己壓力。睇多啲白色可幫助紓緩壓力，所以珍珠白色嘅Inno90就最啱，加上圓形外芒，既可以襯番完美嘅處女座，又可以幫助紓緩壓力，絕對係今年必買「波凸」！
Inno90$3,388
04年最幸運星座係天蠍座，單身嘅會有歸宿，有歸宿嘅感情更會大躍進，想單身孤獨過節都幾難。除愛情得意，04年喺事業上更加如虎添翼，相當順利，不過就要提防小人當道，幸好天蠍座有足夠能量將其化解。天蠍座本身鍾意仔細觀察事情嘅性格，用嘅手機當然有別於一般，而最新嘅Xelibri就相當適合迷人嘅天蠍座，得閒可以當鏡用，繼續喺04年發放迷人風采。
Xelibri6$2,008
04年白羊座喺人際關係相當強勁，識得更多新朋友，因而財運亦都會相應轉入強勢。所以用Nokia3108就最啱今年白羊座嘅朋友，因為可以利用手寫輸入，簡單快捷兼時時刻刻同朋友KeepContact，有利機會自然接住嚟。
Nokia3108$1,888
對工作向來投入及賣命的金牛座，今年會相當多的貴人在旁協助，應該珍惜及好好把握。配合金牛座實幹型的性格，所用嘅手機都以實用為主，而VKMobile嘅VK500就最啱，因為勝在機身內功能夠多，賣相又唔花巧！
VK500$3,380
財運於04年顯得較為反覆，不過雙子座的頭腦靈活令其可以樂觀面對，而靈活多變亦是雙子座優點，最適合手機莫過於可以前後換殼嘅Nokia3200，隨時隨地都可以轉換新花款！
Nokia3200$1,998
上半年的運程未有太大改變，而下半年朋友及收入都會有明顯增加，得閒同朋友傾吓偈相當緊要，或者用SMS都係一種辦法。所以有個大鍵盤玩SMS嘅Nokia6820就相當適合今年嘅巨蟹座！
Nokia6820$2,888
財務問題好大機會困擾04年嘅天秤座，尤其閒時鍾意喺股票上炒番兩手嗰啲，小心投資方為上上策，SonyEricssonT630內置有藍芽，方便天秤座隨時上網昅實個價位！
T630$2,980
有機會於04年大展拳腳的人馬座，面對更多新環境，而其正直及坦率的性格令其可輕鬆應付，所以適應力強的人馬座配埋Xelibri5就認真天生一對，帶住X5上山下海都冇問題！
Xelibri5$1,480
整體運勢都比今年更為優勝，由愛情、家庭、財運及事業都逐步向上，而四四方方嘅手機更能配合意志力強的山羊座用家，所以PantechG500就適合不過。
G500$3,780
雖然04年水瓶座財運不俗，不過對高風險的投資還是要三思而後行，可惜求知慾強的水瓶座恐怕難以辦到，所以不妨買部Nokia6600，淨係得閒聽吓歌、影吓相，都可以滿足水瓶座嘅求知慾！
Nokia6600$3,588
溫柔包容令雙魚座於04年嘅家庭及愛情上都更上一層樓，不過財運方面就認真麻麻，但係幻想力豐富嘅雙魚座總會向好處諗，若果加埋部SharpGX22，閒來影影相，繼續發揮豐富幻想力！
GX22$3,780
