剛踏入2004年，全港市民均期望新一年會有好開始，而亞Mark亦祝願本地車壇，會有欣欣向榮嘅表現。然而，最教香港車迷響新年喜出望外嘅，會係早前亞Mark曾經披露過，話豐田代理即將引入至頂級豪華嘅Alphard大型MPV車系；當大家對此仍半信半疑之際，日前代理即以全版廣告作事先張揚，不僅給車迷有鮮明嘅訊息，同時間亦向一眾水貨車商敲響警號。有咁嘅局面出現，皆因過去兩年多，豐田代理旗下嘅MPV車款Picnic及Previa，均錄得超卓嘅銷售成績，遺憾至Top嘅3.0公升MPV級別卻懸空，因而造就咗水貨Alphard奇貨可居，賣個滿堂紅。
至於話豐田車廠，為何會改變態度，會首肯響東瀛以外，容許Alphard引入香港；除咗係本地市場地位特殊、代理商嘅話事人崔志凱先生夠BargainingPower之外，廠方亦察覺到呢個豪華MPV級別，除卻有日產Elgrand，遲吓本田重會引入全新Odyssey，以及快將投產、用以抗衡Alphard嘅8座位豪華MPV──ASM（有傳正名為GrandWagon）到港嘛！有咁敏銳嘅市場觸覺，難怪豐田車廠近年全球業績節節上升啦！