喺除夕滿六十二歲嘅曼聯領隊費格遜，生日當日被烏拉圭一份報章選為○三年歐洲最佳教練，認真可喜可賀。
據講，嗰份叫做《ElPais》烏拉圭報紙叫歐洲廿三個國家嘅記者，選出佢哋認為喺舊年表現最好嘅歐洲球會教練；結果，由喺十一年第八次幫曼聯登上英超聯寶座嘅費格遜贏咗。
老費唔係第一次攞獎，所以我求大俠認為，呢個獎對佢嘅講只不過錦上添花，但係，對佢旗下嘅烏拉圭前鋒科倫有正面影響嘞。
曼聯話會喺今個月簽人，矛頭重直指前鋒；所謂多隻香爐多隻鬼，今屆後備上陣多嘅科倫隨時冇碇企。但老費俾烏國傳媒笠頂高帽，應唔會虧待科倫；況且科倫踢二十一場入七球，以一個大後備嚟講，算好叻。
荷蘭名宿告魯夫覺得車仔可以稱霸歐冠盃，不過就獨排眾議咁話，車仔成功唔係叻在班貴價球星，而係贏在今季加盟嗰幾個英格蘭球員。咁又係嘅，九二年告魯夫教巴塞做到歐洲冠軍，靠嘅只係三個外援，其他都係西班牙土炮，即係話成功有前科，波友即管放長雙眼，睇吓點？
曼聯加利仔話碧咸雖然去咗皇馬咁耐，但每個禮拜仍然通電話五次，傾吓紅魔嘅近況，言下之意，即係話佢老友念舊，根本唔想走。不過，我求大俠就想同加利仔講吓笑，前排佢對愛華頓嗰個頭槌烏龍波，唔知佢又有冇同碧咸吐苦水，不過相信萬人迷嘅反應都係忍唔住笑。
喺NBA有「鐵漢」稱號嘅馬龍十日前對太陽場波扭傷右膝，已經唞咗三場，但消息傳嚟由於佢傷勢復元得慢，好可能十九年嚟第一次入傷兵名單，對咁多年嚟只係因傷病兼停賽合共缺陣十場波嘅馬龍係一個小小嘅打擊，但冇法啦，馬龍成四十歲，體質點都唔可能同後生嗰陣比。
NBA魔術主將麥基迪喺星期一對紐約人嗰場波，因拉傷臀部退下火線，但佢冇向教練單聲就鬆咗人，冇返後備席同隊友打氣，球會高層即刻有怨言；咁又係喎，麥基迪身為球隊隊長，自己居然咁冇分寸，唔通佢眼見魔術離唔開東岸包尾大幡，已經對球會心灰意冷！