新一年，小初希望可以寫咩升咩，大家賺大錢。
小初日前提及隻中盈控股（766）又話在大陸搞燃氣生意，股價暫時未見有反應，反而被證監會調查緊嘅華燊燃氣（8035），股價就由低位0.73元反彈，假前半日市亦升3.7％，收0.84元，成交股數有成2042萬股，金額1721萬元。
小初百思不得其解，於是走去請教經紀黃，佢就話芬佬界同埋分析員其實都莫衷一是，部份怕怕哋嘅，當然係消息公布後就拿拿臨沽貨，但有個別歐資證券行就覺得，家陣都未摸清楚證監究竟想查咩，況且本來就覺得間公司正，所以仍然堅持本來買入的評價。
由於華燊自從公布被查後，股價由1元直插落嚟，跌幅唔係細，家陣有證券行力撐，兼且有人想博反彈，所以股價就升番唔少。
經紀黃又話，證監會調查一事，令華燊終止咗佢哋嘅配股計劃，但因為華燊發展計劃多多，需要唔少銀両支持，所以相信有人亦唔太想股價過份低殘，影響未來集資行動。
慕容小初