前一排寫過星展銀行馮孝忠（外滙專家）講，銀行財資部現在時興請數學博士或者計量財務（quantitativefinance）嘅畢業生，目標係借重佢哋嘅數學能力，設計衍生產品。當然唔係間間銀行都請呢類人才，但數學叻嘅學生確實係有一條新出路，唔係一定要去教中學。
一位荃灣讀者李先生係數學教師，寫信嚟質疑此說。李先生大概教書數教得耐，有啲牢騷，佢話：「鮮有聽聞念數學可以飛黃騰達……我們子女就算具備數學天份及興趣，也絕不鼓勵他們念數學系……順手拈來有以下個案，某大學前講座教授Y（有錢家庭出身）幾年前不獲大學續約，至今未有教職；某高官L嘅丈夫L博士，出身名校，數年前離開大學後，一直投閒置散；誠然，若能成為數學殿堂級大師，可不愁衣食，但畢竟萬中無一，我們很多行家均認為主修數學是死胡同。」
左丁山數學能力甚差，好佩服讀數學系嘅同學，商界有位巴閉數學家，就係漢國置業（上市公司）嘅老闆JamesWong（一時唔記得佢嘅中文名），亦係培正中學畢業（即丘成桐嘅校友），攞加州理工數學博士。後來捨棄美國教授職位，回港工作，中國染廠（即現在荃灣愉景新城）老闆查濟民就係佢外父。黃教授唔教書，做地產一樣掂，佢頭腦醒目，聰明絕頂，數學咁難讀，佢都覺得易如反掌，做生意點會難倒佢吖。李先生講嘅人物遭遇，其實讀邊科都會碰上，不可一概而論，真係有興趣讀數學嘅天才學生，唔好放棄呀。