香港魚缸經過連續3年下跌後，去年終於反彈35％，恒指去年最後一個交易日升49點，收報12575，較02年底反彈3255點。而最誇張的是，在假期氣氛濃厚兼有SARS陰影下，港股半日成交竟然可以達109億元。據Cookie話，國內唔單止加速開放自由行，亦暗地裏放寬游資來港，今年港股交投絕對唔會少，相信仍然會是國企股天下。中石化（386）及中石油（857）本月調高原油加工量以確保春節期間的供應，消息刺激兩股急升5.3％及2.89％，帶動國企指數升破5000點大關。
銀建國際（171）假前彈升24.56％，收報1.42元，成交激增至8646萬元。先前有一名股東擬悉售手持1.086億股，相當於8.3％股權，但結果係1.172－1.25元水平沽出1823.2萬股之後，就無再商討進一步配股股份。不過據聞呢位股東仍有意出貨，問題係有冇人肯接咁大手貨而已。黑客話，假前此股大反彈兼成交大增，據聞呢手貨好可能已經覓得接貨人，睇個勢呢手貨轉咗手之後可能有一番炒作。
世紀建業（079）先前話入股澳門賭業後已經急升咗一輪，假前宣布發行4500萬元可換股票據集資拓展賭業，消息又刺激該股急升26.7％至0.152元，最值得留意嘅係呢批換股票據行使價係0.3元，較假前收市價0.152元溢價接近1倍，而年息只得3厘，若果世紀建業股價未能升超過行使價，票據持有人其實都冇咩着數，故不難想像有心人可能會將股價催谷至逾0.3元水平。
阿 虎