今年農曆新年嚟得早，一月二十二日係初一，所以華叔（圖）由○三年十二月已經開檔，幫佢個選區嘅居民寫揮春，一共寫咗九次，每次兩粒鐘，大大話話寫咗成二千張，按過往紀錄，華叔重要寫多二十一次先收得工，你話做直選議員談何容易。
華叔墨寶當然值得收藏，八方問華叔，啲市民最多叫寫啲乜？係咪好似老董咁，成日要「安定繁榮」。華叔即刻好有感而發話，其實大部份港人都唔係成日講錢，最多人要嘅係「出入平安」同埋「身體健康」，只係間中一兩個叫佢寫張「橫財就手」，華叔自己唔賭錢，但係都一樣照寫。
問華叔有乜元旦願望？佢話新年同平時冇乜大分別，佢屋企都係貼住張「龍馬精神」嘅揮春，當然華叔都希望今年立法會民主派嘅成績會好啲。
另外，華叔本新書《江山無限》噚日最後定好咗封面，年宵有得賣，全部都係佢喺報章上發表過嘅文章。
傳真︰2623-9278
電郵︰