所謂醜婦終需見家翁，老董張委任名單出咗，跟住就到份施政報告。八方雖然知道劉兆佳忙緊份施政報告，不過見呢輪咁多中央政策組消息，話呢個走，又話嗰個冇晒癮，就打電話畀佳叔求證，順便聽吓佢老哥今年同老闆會有乜嘢新招。
點知佳叔好似傾兩句都唔得閒咁，call咗幾日都唔覆電話，以前就有求必應、半夜三更都肯接受訪問，𠵱家真係冇呢支歌仔唱。人會變、月會圓，怕且佢都係驚一開口就洩露天機，到時俾人查就無謂啦。
有接近中央政策組消息人士話，佳叔對外界咁多關於佢唔happy嘅消息感到莫名其妙，因為事實唔係咁，佢唔知幾咁落力同認真為特區政府出謀獻策。八方識咗佳叔好耐，知佢耐力非同凡響，阿董呢個黑洞雖可怕，不過將問題合理化係社會學強項，佳叔唔講得都寫得，而且佢確係第一個提出中產最多怨氣要疏導，但係老董唔識做，唔怪得晒佳叔。
（圖）佳叔呢排閉門幫老董搞施政報告，記者call佢幾日都唔覆。
傳真︰2623-9278
電郵︰