下星期喺本地上映嘅恐怖片《德州電鋸大屠殺》，將史上最駭人聽聞嘅真人真事連環屠殺案再次搬上銀幕，套戲一開畫就奪得全美票房冠軍，重被影評人大讚極具壓迫力同真實感。而香港電檢處將《德州電鋸大屠殺》列為三級片，而且聲明無論刪剪片中任何場面，都唔能夠改變電影嘅級別，真係非常少有。
《德州電鋸大屠殺》呢個古仔，七十年代已經拍成電影，當年香港譯名叫《慘無人道》，後來喺啲影展再次上映，結果改名為《德州電鋸殺人狂》。呢套戲早已公認為恐怖片經典，嗰個成日揸住把電鋸殺人嘅變態狂肥佬Leatherface，同《猛鬼街》嘅弗迪一同被視為經典恐怖角色，至於新版《德州電鋸大屠殺》震撼之處，絕非只係賣弄暴力血腥畫面，而係本身好真實嘅拍攝手法帶嚟嘅壓迫感。
香港電檢處將《德州電鋸大屠殺》列為三級，而且重話：「無論刪剪影片中任何場面，仍不能改變本片級別。」呢件係非常少有嘅事，因為全片氣氛太過驚嚇同壓迫，令到觀眾由開始到完場一百分鐘都極度不安喎，所以即使刪剪個別鏡頭仍然唔能夠通過！