李華度離開AC米蘭後，佢經理人講過隨時爆轟動轉會消息，但李華度直到呢刻重未搵到落腳地。里約熱內盧市長美亞早兩日就高呼不惜用公帑邀李華度返市內球會效力，唔知算唔算為李華度鋪砌下台階呢？
雖然唔少球會都放過風想簽李華度，但好似得愛斯賓奴同埋聖保羅叫做真正斟過佢，而且都因為佢人工高而傾唔成。李華度話就話免費轉會同埋肯減人工，之但係平極有譜，始終係燙手山芋。美亞拍心口話不惜用公費資助，都希望李華度肯加盟市內四間球會保地花高、法林明高、富明尼斯或者華斯高其中一間。其實佢咁做無非想李華度返里約熱內盧搞㷫個場，為該地主辦○七年泛亞運動會同爭辦二○一二年奧運做宣傳。一代球王最終會否屈就當宣傳工具，值得拭目以待。
披頓星期六將率領湖人倒戈自己効力咗十二年嘅超音速。超音速原本計劃為披頓搞個回歸慶典，不過披頓不但唔領情，而且重怒責超音速班主史查斯忘恩負義，當年將佢踢到公鹿。「手套」重叫史查斯比賽時記得到場，因為到時一定做番場好戲畀佢睇。今次超音速有難囉！
最近有富咸球員同英傳媒「爆料」，數前任領隊泰簡拿「罪狀」，話泰簡拿比賽前淨係掛住喺更衣室睇小說，並未有同球員進行「賽前會議」。照睇呢位「二五仔」應該唔係法國兵，事關今季見過沙夏等人，喺入咗波之後展示「多謝泰簡拿」字句嘅汗衣，咁你估係邊個咁反骨呢？
阿仙奴列文果然敢作敢為，佢繼禮拜一對修咸頓完場前用個波掟菲臘斯後，日前就燒到國家隊正選龍門簡尼嗰叠，呼籲大家諗諗佢定簡尼好啲。佢話德國近年對親強隊都輸（暗寸簡尼唔掂），而自己近年冇乜犯錯喎。列文唔打波都可以轉行打乒乓波——做硬「單打」冠軍。
米杜士堡宣布特准西班牙中場文迪達放幾日假，理由係文迪達踢西甲或意甲時都放慣歇冬假期，早幾日「開完快車」一定好辛苦喎。我求大俠覺得米記咁做固然體恤球員，之但係會唔會惹人妒忌？又會唔會做壞規矩，逢外援第一年過冬「開完快車」都有假放，就不得而知囉。