恒指在03年最後一日，有49點進帳，廣州沙士事件影響淡化，好幾隻重磅股繼續做櫥窗活動，一於當啲不利消息冇到。
除咗兩隻重磅石油股中石油（857）與中石化（386）繼續有人做嘢之外，中電信（728）再下一城，前日升12.5仙，昨日再升20仙，見3.20元，創歷史新高。唔覺唔覺，同前年11月上市招股價1.47元比較，升咗1.2倍，當時掛牌初期，曾經潛水。標準Call輪9910收90仙，升23%，隻輪今年6月到期，溢價負0.6%，槓桿率3.6倍，槓桿率低咗，爆炸力亦降低，另方面風險亦會低啲。
電訊股中，聯通（762）較弱，收7.25元，跌15仙，可以博反彈，不過啲Call輪好難買得落手，隻隻溢價都好高，心理上好難克服。例如9259，冇錯06年3月至到期，大把時間，不過輪價21仙，槓桿率3.5倍唔算勁，但畀到39.3%咁高溢價，唔係好多人捨得。不過想炒嘅話，又可以自我搞通思想，就係買時畀高溢價，賣時亦收高溢價，所謂「高來高去」。
恒地（012）升15%，帶挈Call輪9215彈升17%，收27.5仙。隻輪今年5月到期，溢價9.7%，槓桿率12.5倍。樓市氣氛轉佳，地產股睇番好啲，9215有機會回順些少之時，買啲揸吓。
章盛