踏入二○○四年，八方問白鴿黨前主席馬丁今年有乜嘢願望，佢話咁嚴肅嘅問題，要諗一諗先。之後佢就好有條理咁話，希望今年中央政府同香港市民嘅關係可以有所改善，因為所有嘅調查都顯示，香港人對中國政府嘅信任增加，特別對新領導層胡溫好有好感，總之馬丁希望中央今年更信香港人，冇咗互信，就好難令「一國兩制」成功。
雖然馬丁冇畫公仔畫出腸，但係佢希望中央放手畀香港直選特首，加快民主步伐就唔使再多講。
至於今日元旦日，馬丁當然一如以往去遊行，佢話都聽到有老友驚住今日出嚟行嘅人少，會發出錯誤信息。佢就唔怕，因為係兩回事，只有土共先會沾沾自喜，北京乜都心中有數啦，你哋唔出嚟行，唔等於今年九月唔出嚟投票，所以中聯辦最近已經加強陣容，中央多派兩名副主任彭清華同黎桂康嚟香港睇住個局。
傳真︰2623-9278
電郵︰