商台長壽廣播劇《十八樓C座》針砭時弊，立場鮮明，係鎮台之寶，個劇本來由深水埗民主黨區議員王德全監製，今年民意洶湧反23條同倒董，《十八樓C座》都不避敏感高談闊論，前排德哥參選事忙改由童星出身嘅馮志豐頂上做監製，商台中人初時以為只係暫時性安排，點知馮志豐坐正成為揸fit人。
換咗監製嘅《十八樓C座》內容表面上冇乜唔同，不過有「長期聽眾」聽完噚日一集覺得有啲唔妥，思前想後終於恍然大悟，原來劇中人叫市民「考慮清楚」先好參加元旦大遊行，因為有政客「撈政治本錢」，所以唔好俾「嘩眾取寵」政客利用。八方聽聞出街版本同咪後版本有啲唔同，風格唔似得以前咁激。
德哥話呢次調動由公司安排，沒有政治理由，「個劇路線應該一貫風格唔會改變啩。」商業一台台長梁文道就話搵馮志豐監製《十八樓C座》係要培養新人，「馮志豐以前都做過《十八樓C座》編劇，而且編劇自由發揮，監製唔會干涉，每個編劇風格唔同，噚日嗰集觀點好平衡，冇叫人唔好遊行喎。」
傳真︰2623-9278
電郵︰