老董唔理民意，照樣委任足一百零二人做區議員，表面就話當中保皇黨少咗，事實就係好多潛水友，遲吓就會表露身份。利用委任特權嚟抗衡民選嘅民主勢力，呢招夠毒，𠵱家民主派喺區議會，剩番葵青區周奕希同埋深水埗譚國僑一定做梗主席，其他區區都勢均力敵，一係六對六，一係七對七，民主黨李永達兩公婆剛從吳哥窟充電回來，面對呢個形勢都話有排煩。
好似灣仔區咁，自動當選嘅黃英琦夠晒資格做主席，但係呢位前自由黨成員只係一人黨，想做主席就要得到民主黨同埋「公民起動」支持。
正如達仔講，佢阿姐如果表態支持○七普選特首，○八普選立會，咁都算同道中人有得傾，否則就好難支持佢做主席，講到咁白，黃英琦應該收到。至於中西區，民主黨甘乃威亦想做主席，不過冇十足把握，重要搞協調喎。
（圖）喺灣仔區自動當選嘅黃英琦，夠晒資格做主席。
傳真︰2623-9278
電郵︰