老董雖然深居簡出，盡量表現親民，聽意見，又對胡溫必恭必敬，但係坊間傳佢會明年「提早退休」嘅消息仍然未停過，而且講嘅人都來頭不小。
傳聞話，老董三月前唔會走，因為台灣總統大選，無謂節外生枝，最大可能係佢老哥喺九月立法會選舉前，或者後走。一種分析話，如果九月選舉民主黨大勝，就係佢落台之期；亦有一個說法，話到時為時已晚，橫掂要走，遲走不如早走，選舉前落台或有助民建聯得同情分多一兩席，咁起碼可以保住個立法會，等到接班人坐上個位冇咁頭痕。
有位心水清嘅政界中人就話，大家唔好發白日夢，因為一日江澤民重軍權在握，就會同香港人鬥氣到底，老董好難唔捱落去。有人同八方打賭，老董一定走唔成。到時邊個應驗都冇緊要，民心所向，胡溫已非常清楚，佢哋幾時出招，等老董體面下台，大家心中有數。
傳真︰2623-9278
電郵︰