大除夕半個交易日，大市升勢持續，國企股表現仍最突出，恒指收市12575，升49點，成交109億元，期指高水61點。國企指數高收5020，大升136點，升幅2.8%，成交19億元。中國人壽（2628）日後成為國企指數成份股，國企成交肯定會倍升，噚日國壽成交已23億元，遠遠拋離排第2位中石油（857）的4.5億元。
噚日上升股（不計認股證）有389隻，係大半個月來最多1日，有部份應該係粉飾櫥窗，但成交又大增的，便要留意。意科控股（943）近期消息好勁，噚日高收0.39元，升1仙，成交大增2.7倍至2443萬股，聽講下禮拜開始，陸續會有大動作，初步目標0.45元，跟住會見5字頭。
意科原本經營製造和IT業務，近年全力發展物流，並已成功在珠三角和長三角建立據點，計劃短期內可搶佔兩地，甚至北京和武漢等市場。內地物流業發展潛力甚大，基金亦好睇重呢瓣，特別係意科嘅「拍檔」，都係內地佔有天時地利嘅大集團，因此，日後若有基金入股意科，唔會令人感到意外。
意科在深圳的夥伴係深圳控股（604），組成合營公司，各佔一半權益，深控擁有全國面積最大的倉庫，對發展物流業非常有利。至於長三角的夥伴，來頭更勁，係中國長江航運總公司旗下的上海長航，合營公司主要在武漢至長江口一帶進行三方物流業務，為客戶提供國際物流、倉儲及顧問服務。長航集團在長江運輸上居於壟斷地位，資產總值逾400億元人民幣。
由於合作夥伴的物流設施全屬「現成」，只要有客，就有收益。意科的嘉意物流已擁有唔少大客戶，在市場推廣方面，佔有優勢，預計04年開始，物流業務已可提供可觀盈利貢獻。
意科往績令人欷歔，01年（12月年結）因撥備而虧蝕12億元，02年蝕1.14億元，03年上半年再收窄到1648萬元，但轉型物流後，估計可迅速轉盈。意科市值7.3億元，每年若獲利7至8千萬元，PE只10倍，基金若上車，不難會有脫胎換骨表現。
郭兆誠