○四年雖然有八成機會好景（根據種種經濟數據判斷），但睇嚟不會一片順景。昨日講金融界老波骨之言，值得考慮。○四年嘅中央對港主題曲係如何「控制」、「阻遏」民主派，務求民主派喺立法會選舉唔可以增加太多席位。怎麼樣「控制」、「阻遏」，存乎一心，不外乎統戰、拉攏，打擊一小撮之類，不知會造成點樣嘅衝擊，如果落手重啲，好容易激發示威也。
農曆年立春之日，係二月四日十九時五十七分（據萬年曆），八字係甲申年，丙寅月，癸丑日，壬戌時，其中三柱係天干地支互剋，即係申金剋甲木，丑土剋癸水，戌土剋壬水，似乎係上下不和，紛爭不斷之象，至於詳細情況，有待請教師傅。
故此○四年經濟應該轉強，政治社會就會不斷爭拗，噪音多多之際，股市會唔會突然間嚟一個大調整？大家小心。睇聖誕期間出版嘅《財富雜誌》，威水基金經理教人點樣投資。差唔多個個睇好，但其中一位就持相反意見，認為○四年未必係預料咁好，教我哋做對沖。據呢位仁兄研究，每一次S&P指數跌市，都見到「木材」（timber）價升，所以佢認為○四年買股票者，不如亦買定timber，買期貨就危險啲，佢建議買木材REITS（即擁有好大樹林地皮嘅Reits），呢條橋係左丁山第一次聽到，所以抄低，等各方高明考慮吓。