俾佈景擊傷搞到抑鬱
馮仁昭四圍超：林建明向亞視索償三千萬

林建明噚日入稟法院，向亞視索取約三千萬賠償。入稟狀表示林建明喺廣播道亞視總台發生意外，所以控告亞視疏忽，索取賠償。

布景板打到流血
大姐明喺○一年九月二十七日當晚主持完節目離開，經過錄影廠後門時，俾一幅大風吹落嚟嘅布景板擊中，搞到頭破血流跌倒，大姐明發現自己流血就驚到即場喊出嚟，要在場人士送佢去醫院。
喺醫院住咗一晚，大姐明個頭縫咗兩針，第日就出咗院，舊年年尾，佢話患上咗抑鬱焦慮症，工作超過兩個鐘就會好頭痛，一直要睇醫生。大姐明噚日唔喺香港，所以聯絡唔到佢，不過代表律師林炳昌就話：「林建明患上嘅抑鬱焦慮症，係因為呢次意外引起嘅，亞視方面一直肯承認責任，不過賠償嘅數目就未決定，所以先至會入稟，追討嘅賠償數目大概係三千萬。」
案件編號：HCPI1401/03

林燕妮另一胞弟病逝
繼林振強去年十一月與世長辭後，林燕妮另一個細佬林振剛亦同林振強一樣因為淋巴癌，喺前日過身。噚日記者致電林燕妮，佢語調哀傷，喺電話中承認胞弟死訊，佢話：「係，佢十二月三十日喺香港過身，享年四十七歲。」林燕妮短短時間失去兩位親人，希望佢節哀。

陳松伶唔再保守狂騷纖腰
陳松伶寫咗本新書《松松姐姐美容魔法》，分享自己嘅瘦身心得，佢日前影咗一批宣傳照晒小蠻腰。松松重專登揀喺元旦推出新書，佢話：「03年好多唔好嘅嘢發生，我希望新書元旦推出，代表一個新開始。」馮仁昭都覺得佢揀啱時間，希望今年娛樂圈有一個好開始！

梁漢文今晚狂掃《叱咤》大獎？
係人都話港台頒獎禮等於英皇頒獎禮，咁講法今晚商台《叱咤頒獎禮》都應該叫做黃柏高頒獎禮，皆因攞大獎嘅大部份係佢旗下歌手。梁漢文喺佢事業谷底時簽咗黃柏高，馮仁昭都覺得佢就真係好彩。據聞佢將狂掃《叱咤》大獎，有「至尊歌曲大獎」、「至尊唱片大獎」，因為《叱咤》賽果係計播放率，所以計晒數佢將會攞埋男歌手銅獎㖭。

王敏德揸車講電話被罰錢
王敏德被指喺去年八月三十一日，喺跑馬地揸車時用手提方式用流動電話，結果被政府票控。十一月嘅時候佢一心以為書面認罪判罰錢會冇事，點知繳付罰款嘅支票出咗問題，結果噚日要親自到裁判法院處理，最後被罰五百蚊。
案件編號：WSS14543/03

許志安狂Call商台博獎
係人都知《叱咤》賽果係計播放率，計晒數之後男歌手金銀銅依次應該係許志安、陳奕迅同梁漢文。馮仁昭有個商台老友話，原先金獎照計應該係陳奕迅，但許志安自港台一役之後，想喺其他頒獎禮盡搶大獎，於是佢不停狂Call商台高層同監製，㷛歌傾獎，煩到商台啲人怕咗佢，於是喺截數前幫佢不停播歌喎。