03年樓市大起大落，估唔到連發展商售樓部嘅要員，都有唔少人事變遷，大多數都係女將。
舊年先由嘉華地產加盟長實做商場租務嘅文靜芝，輾轉又過咗檔合和實業，據聞都係負責租務。
同樣係賣樓界女將嘅史慕蘭，喺電盈基建主席李智康嘅領導下，貝沙灣賣個滿堂紅，但當二期銷售暫告一段落，佢就重返香港興業。
向來係新地賣樓部得力幫手嘅市務總監林寶彤，上個月初離任。舊年新地賣得最好嘅樓盤元朗YOHOTown，就係由佢負責推廣。舊年負責賣三個新盤，成績令市場刮目相看嘅華置董事助理凌緣庭，聽聞已轉搞租務。
由信和集團加盟嘉華地產嘅方俊，舊年離開嘉華後，新落腳未有公布。由長實跳到信和嘅尹紹剛，又閃電離開，小道消息話佢北望神州去也。
攀石活動近年好受歡迎，香港就有個叫做「生命歷奇」嘅組織，專搞呢類同大自然有關嘅歷奇活動。美聯噚日就請咗創辦人李耀輝，出席華懋記者會，佢話透過活動，令城市人可體驗大自然，學習面對逆境，好似攀石，就希望參加者明白，喺逆境中尋出路同希望。
樓市呢幾年不景氣，相信代理們對於李先生所講，點樣面對逆境感同身受。美聯噚日派出沙田區嘅梁志輝即場體驗一吓，有勇闖高峯嘅寓意，好似新年採青咁，去到最高點拉開布條，寫住美聯廣告嘅口號，寓意04年嘅樓市，扭轉以往嘅劣勢，轉危為機。
03年係一手盤嘅天下，但由於二手市場都開始郁動，代理界都睇好04年嘅二手市場，重認為可能好過一手㖭。不過，過去幾年大部份代理都走晒去做一手，只係識得「打街霸」，對於點做二手就變得有啲生疏。
有意全面拓展二手市場嘅香港置業，日前就舉辦咗個「二手實務課堂」，藉講座、研討同個案練習，加強前線同事對二手市場嘅認知，同對相關條例嘅了解。
新一年伊始，樓市即刻有喜訊，市場消息話，九龍倉賣樓掌舵人嘅黃光耀，除咗今日公布舊年集團賣樓佳績外，重會派新卡片。既然有新卡片派，市場估計佢都係再上一層樓，有得升職，不過當事人就叫大家唔使估，今日至會揭曉。
黃光耀接掌賣樓部後，負責嘅幾個新盤，好似尖沙嘴擎天半島、深井碧堤半島等，銷售成績理想，就算市道唔好嘅時候都可以去到貨，證明佢都係有計之人。
蘭西
電郵地址：
