梅艷芳日前不幸病逝，樂壇繼羅文、張國榮和林振強後，又喪失了一位瑰寶。香港IFPI為表揚他們四位對樂壇所作出的貢獻，四月舉行的頒獎禮將首設「傑出成就獎」追頒給他們。
繼羅文、張國榮（哥哥）和林振強先後與世長辭，前日梅艷芳亦因病逝世，樂壇接連損失了四位重量級人馬，近年的香港樂壇可謂充滿愁雲慘霧。而IFPI（國際唱片業協會）為了表揚四位巨星生前對樂壇的貢獻，擬在今年四月的IFPI音樂頒獎禮追頒「傑出成就獎」給他們。
樂壇歌迷皆損失
IFPI主席陳志光昨日被問到此事時，他在電話中說：「初步我係有咁嘅構思，但都要下個禮拜同IFPI執委開會再作最後決定。不過我個人認為阿梅、羅文、哥哥同林振強都係樂壇不可多得嘅瑰寶，𠵱家接二連三損兵折將，當然係樂壇及樂迷重大損失。佢幾位對樂壇有咁多貢獻，追頒一啲獎項畀佢哋都應該。」
梅艷芳其實在九三年已獲得無綫的十大勁歌金曲頒獎典禮「榮譽大獎」，九九年又取得第二十一屆十大中文金曲頒獎禮最高榮譽的「金針獎」、前年又獲得無綫十大勁歌金曲頒發「致敬大獎」，而去年港台的十大中文金曲又頒了一個「25周年銀禧大獎」，她在生前已經得過多項最高榮譽的樂壇大獎，IFPI計劃再頒一個「傑出成就獎」給她。陳志光說：「IFPI一向只頒同銷量有關嘅獎項，不過為咗表揚阿梅同哥哥等人，我會同其他執委研究加設一啲類似傑出成就獎嘅獎畀佢哋。」
「佢天生食娛樂圈飯」
陳志光在九一年認識梅艷芳，兩人曾經在華星唱片共事，他說：「阿梅係一個天生食娛樂圈飯嘅歌星，做事又認真勤力，喺演藝界又有號召力，佢生前真係幫娛樂圈做過唔少嘢，佢四十歲就走咗，難怪咁多圈中人傷心。」
栽培新一代巨星
陳志光又指樂壇正處於一個青黃不接時期，如果不能盡快栽培新一代巨星，對樂壇肯定會造成嚴重影響。他說：「近幾年嚟香港歌星喺東南亞影響力已不斷減弱，同以前梅艷芳、張國榮全盛時期喺東南亞嘅受歡迎程度相差好遠，所以除咗我哋唱片公司要努力捧人外，同時亦需要媒體幫手谷新人。如果樂壇同媒體唔正視呢個問題，肯定會對樂壇造成深遠影響。環顧𠵱家樂壇，要搵番好似羅文、阿梅同哥哥三位喺舞台百變嘅天皇巨星真係好難，真係唔知要培養幾耐先搵啲咁有風采嘅歌星。」
採訪：陳月媚
