新年新氣象，八方噚日周圍打電話問候老友，互祝新年衰氣盡去、景氣重來。同大律師梁家傑傾開偈，佢嘅新年願望認真偉大，唔似一般人咁話身體健康、賺多啲錢，而係希望香港打破過去一年沉鬱嘅悶局，唔好再日日家嘈屋閉。
咁有乜好橋呢？梁大狀話，盡快開始政制檢討嘅對話就係其中一個方法，因為回應民意、營造和諧氣氛，先可以增加社會凝聚力。講到新年節目，梁大狀當然係去參加今日嘅元旦大遊行，噚晚大除夕就同老婆仔女過。
八方聞言好羨慕，因為呢兩日多新聞多到嘔，除夕都冇假放，元旦又要跟大遊行新聞。梁大狀聽到，竟然講風涼話，叫八方除夕放工仍然可以去除夕倒數，就算玩通宵遲啲瞓都唔驚，因為大遊行今日下午先開始。
傳真︰2623-9278
電郵︰