【本報訊】時裝設計師鄧達智在梅艷芳出道時已認識她,但卻未曾合作過,他說:「阿梅係一個好忠心、好尊重幫佢做形象嘅人,佢咁多年都係搵劉培基幫佢嘅,係呢一兩年着ChristianDior啫。
「喺中國人社會,冇人比佢更『天生係明星』,加上有一副好骨架,任何誇張、論盡嘅歌衫都難唔倒佢。好似佢喺八十年代嗰啲粗眉、金色口唇嘅化妝,當年根本冇人夠膽喺台上咁樣,阿梅就好成功咁創造潮流。
「我認識嘅阿梅,台上台下係兩個人,台上嘅佢燦爛奪目,內心嘅佢其實幾寂寞嘅,佢咁多個百變造型中,最令我難忘欣賞嘅係佢有一年憑《胭脂扣》攞影后,佢簡簡單單着件黑旗袍,已經將中國女性嗰種淒怨韻味流露出嚟。」
提起與阿梅生前的往事,鄧達智說:「記得有一年我生日,成班朋友包括羅文、陳百強同阿梅等喺當年嘅『DD』同我慶祝,當晚得十幾人啫,佢哋三個一拎起支咪就好似喺紅館對住一萬人唱歌咁,對唱歌嘅熱愛真係與生俱來。」