經紀陳早排提及隻EVI教育（8090）幕後有財技高手助陣，噚日隻股又失驚無神炒上55.9％，成為昨日升幅之首，雖然成交金額只得39.5萬元，但已經比平時大咗。
小初於是抱住半信半疑的態度，走去問經紀陳，究竟人哋搞緊咩？佢話江湖傳聞可能涉及股權變動，但講真一句，佢都係唔係好信。佢話EVI已發行股數有成40億股咁多，以噚日收市價計數，市值有成3.6億銀，雖然家陣殼股有價，就算創業板殼價升咗都好，最多都只係講緊千零二千萬銀咁大把，所以佢就唔係太敢相信呢個傳聞。
不過咁，小初就心諗，今日係12月31日，會唔會有人想趁年尾mark下價，咁就不得而知喎。
另外，噚日中國數碼信息（250）同埋南海控股（680），公布重組阿仔變阿媽之後復牌，竟然係南海勁升40％，而中國數碼創新高見過0.248元後，勁跌18.33％，收0.196元收市。
經紀陳話，據聞坊間好多捧場客中伏，條氣非常之唔順。
慕容小初