「民主女神」余若薇被女性刊物《財姿雜誌》選為○三年風雲女性（Womanoftheyear），做埋封面（圖）。記者話喺傾談中，感受到余若薇好大機會參選明年立法會。
余若薇自己就喺訪問中話，會以大局為重，最希望就係盡快有普選。有人擔心香港冇足夠份量嘅政治人物出選，余若薇不以為然，話到時自然有人出嚟組班子，陳方安生唔定、唐英年唔定、梁振英都唔定（嘩，唔係呀哇，余小姐？），總之香港好多人都有興趣。
講到扮靚靚，原來余若薇都唔係好講究，每日揀衫時間唔多過十五分鐘，化妝亦都好隨意，不過有次用咗隻佢自己覺得好靚嘅紫色眼影，點知俾人問佢係咪俾人打腫咗對眼，搞到佢之後好耐都唔敢再塗眼影。
至於落妝方面，余若薇話唔會用卸妝液，就咁用支潤手霜抹吓就算，平時亦只會用清水洗面，呢啲叫唔叫天生麗質？
傳真︰2623-9278
電郵︰