1982年，梅艷芳憑着一束金色舞衣、一曲「風的季節」走上光輝星途。其低沉的嗓音、豪氣大義的作風，與舞台上多變的光芒，令歌迷們對她不離不棄。今年9月，她向傳媒宣布患了子宮頸癌的消息，像要證明給大家看她的不易言敗。阿梅的離開，令街頭巷尾同感痛惜，就讓我們一起懷念這位天皇巨星。
記者、攝影：副刊組
據唱片業行內人稱，其實梅姐患病消息一出，已經有不少歌迷大掃她的唱片，所以現時市面很多正貨已是買少見少。據信和地庫CD經濟特區負責人阿堅所講，梅艷芳的唱片最有價值的就是她早期由日本製作的唱片，這批唱片的封底有註明日本製造，已絕版多時，二手價一隻都要過$200，而當中就以《壞女孩》最多人搵，因為《壞女孩》最有代表性，而且此碟令她一炮而紅，又斷市多時，所以最值得珍藏。另外還有《妖女》及《醉人情懷》（VCD）亦是非常罕有。
由於是暫時市面買到的最新作品（03年演唱會仍未出街），去年《AnitamuiFantasyGig2002》的CD及VCD亦大賣，在某些舖頭早被一掃而空。「此碟屬新貨，返貨較易，每隻會加廿零蚊，CD每隻賣$115，VCD賣$118。」
負責人強力推介，83年的《赤色梅艷芳》，因為有《赤的疑惑》、《交出我的心》等經典作品，由於是新版，二手價$98就有交易。不過記者亦見信和某店舖乘機標至五百大元，真離譜。
阿梅除歌唱事業成就輝煌，其所拍的電影一樣令人津津樂道，廣視軟件專門店老闆陳先生認為《胭脂扣》屬必睇佳作，「胭脂扣最多人搵，成個旺角都冇晒貨喇！如果再返貨，都唔會加價，VCD照舊賣$15。」
另外，達利雷射影視中心老闆Alan說：「《金枝玉葉2》一直以嚟都咁多人搵，哥哥逝世時已經俾人掃咗一次，今朝剩番幾隻，不過即刻俾人掃埋！之後返貨會唔會加價，我就唔敢講喇！」
旺角CD舖直擊
梅艷芳死訊一傳出後，旺角各大小唱片舖店員都忙於將貨倉內的所有存貨開箱，釘上價錢牌，務求以第一時間將所有屬於梅艷芳的CD放上架，方便Fans掃貨。
信和內亦有明星相專賣店第一時間將所有掛在門上的明星相換成梅艷芳的近照，但只此一間，數量不算多，要掃亦要快手。
旺角各大小影視店由今朝開始已塞滿不少歌迷，全部都希望可以盡快補購過往的舊CD、曾主演過的戲或演唱會，最近一次的演唱會尤其受歡迎。
兩代女Fans各有所愛
Yellow自言並不算是超級Fans，「我由佢在荔園表演時已經開始聽佢唱歌，後來連仔女都買佢啲碟，我睇過佢一場演唱會，但02年呢場無睇到，覺得有啲可惜，所以就搵番佢呢隻碟。」
年紀輕輕的亞茄近幾年才喜歡阿梅，「我最鍾意佢同張學友嗰套《男人四十》，而歌我就最鍾意佢同鄭秀文合唱嗰首單身女人，兩代天后一齊唱，好難得，所以好有紀念價值。」
