下晝傳來廣州沙士單嘢化驗呈陽性反應，港股升幅收窄，若然唔係有件咁嘢，港股已然更上一層樓，創新高。12月期指結算，明年1月期指作準，高水15點，情況唔算壞。
芬佬繼續如狼似虎，硬捧中石油（857）同中石化（386），兩隻大油股又創新高，分別再升6.1%與7.3%，相關Call輪自然意氣風發，其中以特種輪為主。兩隻油股大升，升到超買，因住芬佬年結完畢，放軟手腳，啲油股有獲利回吐，𠵱家追急升後嘅石油Call輪，要先諗風險嗰便。
另1件石油股中海油（883）冇咁好彩，收15.60元，跌50仙。近期已調整，相對冇咁熱氣，趁低捧Call輪，風險相對低好多。想買賣容易，揀9032，明年6月到期，輪價33仙，溢價10.1%，槓桿率4.7倍。想數據靚，則應揀9255，明年7月到期，輪價34仙，溢價4.4%，槓桿率4.6倍。兩件都係標準輪。
華資股威水嘢有新世界（017），前5.55元，昨收6元，升8.1%，帶起唯一Call輪9297，收84仙，升幅75%，有近30球易手，隻輪明年6月到期，溢價28.7%，槓桿率7.1倍。昨日升得急啲，上車要諗吓風險嗰便。
冠軍（092）收1.62元，升4仙。末日輪1134收40仙，只升1仙。下月6日最後買賣，負溢價3.6%，槓桿率4.1倍。若然諗住長揸正股，買輪供錢，總成本1.56元，抵過買正股6仙，屬於化算。
章 盛