二人男子組合Boy'Z嘅關智斌（Kenny）噚日二十三歲牛一，前晚喺駿景酒店舉行生日會。英皇娛樂老闆楊受成、拍檔張致恆（Steven）、鄭希怡（Yumiko）、梁樂瑤、劉思惠（Maggie）同梁敏儀都有出席派對。
正當英皇歌手開緊party之際，喺駿景對面嘅養和醫院，卻因為有好多藝人趕去醫院見梅艷芳最後一面而一片愁雲慘霧，不過Kenny就似乎唔清楚呢件事，但佢話家姐都係阿梅嘅fans，所以由細到大都成日聽阿梅嘅歌。
Kenny話今年香港有好多唔開心嘅事發生，呢排嘅新聞又不時有人輕生，所以佢前晚許嘅願係希望大家珍惜生命。Kenny又話希望喺出年嘅樂壇頒獎禮，攞番個飛躍大獎。而Maggie送咗戒指同鏈墜畀Kenny，Yumiko就好神秘咁話送咗份好實用嘅禮物。
Cookies出道以來經常着制服出席活動，不過自從由九餅變四餅，喺形象上可以花更多心思。Kary日前話：「𠵱家我哋嘅衫同鞋都有贊助，我都冇乜買衫，所以慳番唔少。以前我哋九個人嚟嚟去去都係着制服，有時重唔止見一次報㖭，𠵱家我哋有形象幫我哋襯埋啲衫，贊助我哋嘅adidas每次有新貨都即刻畀我哋着，真係幾好㗎！」
言承旭不嬲係費翔嘅fans，佢聽聞偶像出年年初喺四川成都舉行演唱會，主動要求做演唱會嘉賓，不過俾費翔拒絕咗。費翔話唔想言承旭過年咁辛苦，如果佢要去，就喺台下做歌迷就得喎。唔好以為費翔驚言承旭搶咗自己嘅風頭喎，其實佢哋好老友，言承旭話有時間，一定會去捧場，認真唔話得！
姚嘉妮對有份主演嘅劇集《花樣中年》收視一般感到心噏，噚日佢喺將軍澳電視廣播城出現，佢冇晒心機咁話：「遇着聖誕假都冇計，都有啲失望。不過我拍得好開心，同錢嘉樂合作時，佢哋成日爆肚，反應要快先可以接到，笑到我肚都有腹肌。」
許晉亨嘅女友洪廣已有一段時間冇露面，近日喺佢身邊出現嘅係落選女優徐綺雯。日前許晉亨同朋友去銅鑼灣食火鍋消夜，不過就唔見徐綺雯。直至凌晨兩點幾，佢哋先至離開，見許晉亨登上七人車，重載埋打扮斯文嘅女伴去麥當勞道一單位，許晉亨落車時重好有風度咁幫佢攞手袋㖭。
