揸住開篷法拉利、有美相伴、兜住風聽澎湃音樂，算唔算人生最高享受？闊別十多個年頭經典賽車Game《OutRun》，最近以超華麗畫面登場。呢隻《OutRun2》一到馬上成為機舖車迷追捧對象，不停入錢煲機。筆者特別搵嚟兩位「超速」車神教路，等一眾新牌仔快速上手，一嘗邊片車邊睇靚景嘅享受！
記者、攝影：朱崇德 ImageGirl：Chirsty
鳴謝：《GameWave》、太田娛樂
第一代《OutRun》喺84年香港機舖萌芽時期，第一隻打正「賽車」遊戲響朵嘅街機Game！只要稍為有點「機齡」，甚或如筆者着住校服「日日」蒲機舖者，有邊個未為佢沉迷過？呢隻Game更先後喺86年出《TurboOutRun》及87年出《OutRunners》，一樣好評如潮，但估唔到要闊別16年，真正第二代續篇先推出！
《OutRun2》同前幾集最唔同之處，係首度攞正法拉利License出賽車Game，可選車種共8款，全部都係法拉利名車，車款由70年代嘅365GTS/4同Dino246GTS懷舊款，到最新款嘅ENZO（2003年）都有，架架名車，絕對經典！
世嘉好似有心讓機迷懷舊一番，所以地圖設計一樣沿用多年嘅倒金字塔設計，全條賽道共5版，每版有2條賽道分支，向上走難度較高，向下走則較易玩，走到尾會有5個不同結局！當中不得不提係起點賽道－棕櫚灘，賽道設計可謂84年舊版嘅Remark，不過畫面精細程度當然不可同日而語啦！
如果問《OutRun2》點解一出，馬上成為「車迷」馬上追捧對象？畫面超華麗絕對係重要因素，就算相對同廠嘅《頭文字Dv1.5》，都優勝得多！而且賽道風景亦多變，例如以窄路多彎為挑戰嘅巴黎、充滿埃及風味嘅沙漠、濃霧瀰漫鬼影幢幢嘅森林等，都在一隻Game內包晒！點都過癮過你係咁上、下坡道，齋樹影兩頭走啦！
甩尾亦係今集賣點，基本Game內大彎小彎，都可以將四條軚冒住煙，好似「擦紙膠」咁捽住入！好多機迷都話未見過賽車Game可以好似佢咁好捽！點玩盡呢4條「擦紙膠」，將會係今集跑極速時間嘅最重要課題！
只得18歲嘅Adrian，好難想像已經係一個擁有兩年澳洲車牌嘅飆車高手。佢同漫畫嘅拓海一樣，擁有一架全改嘅AE86，賽車Game一向都係佢嘅至愛！「返到香港！馬上迷上街機賽車Game，不過覺得《OutRun2》係暫時畫面最正嘅一隻！甩尾程度有啲超乎常理，但甩得好過癮，打機太真，反而唔好玩！」《OutRun2》一到，Adrian已經馬上打爆機，𠵱家每日煲住就係為咗打破自己極速紀錄。
Adrian教路：想打得快，一定用手波！只要將波棍「落一個波、上一個波」，馬上就做到甩尾；自動波就冇咁方便，要先放油門、踩Break、扭軚、再踩油門先得，動作多兼失速情況亦嚴重！
HeartAttackMode係《OutRun2》新遊戲模式，雖然賽道一樣，但座位旁多了位靚女Clarissa，經常提出一啲無理又難度高嘅要求；例如不斷超車，只可甩尾入彎、撞低所有雪糕筒、規限紅或藍色賽道等，如果做到佢嘅要求，就會加你「心心」（即喜歡程度），爆機時就可以𠝹到Clarissa！而阿爻就係當中𠝹女高手，每晚都係三、四十蚊咁煲機！最勁攞到1,153個心。「重點係唔好犯錯，心心係一個一個加上去，一炒車可以唔見成百幾個心㗎！」
阿爻教路：其實一樣係玩甩尾做重點！多留意是入內彎定外彎，外彎要高速入先穩定、內彎甩尾就要減速入，車尾先唔會「篩」出去！新手推介使用365GTS/4或Dino246GTS，兩車表現平均，出彎亦夠穩定。
秘技
估唔到《OutRun2》都有秘技！喺揀車畫面度，踩住Break，再將支波棍推上拉落，就可自由選擇車身顏色，顏色選擇包括有紅、黑、黃、綠、銀、白、淺藍及深藍！雖然唔會似《GT4:Prologue》咁即時變色，不過左下角會有英文顏色簡寫，入到Game就用到。
