精電國際（710）今年10月見9元高位，創01年1月以來新高，近期回落幅度15%，可候7元邊緣上車。
■03年（12月年結）上半年，集團營業額6.13億元，增22%；純利6702萬元，急升37%，每股盈利0.22元。以業務地區而言，歐洲是最大市場，佔總營業額48.3%，歐元強勁對其有利。然而，增長最速的市場則是中港市場，半年營業額由1.13億元急升至1.97億元。歐洲市場營業額2.96億元，增長15%，佔總營業額比重由51.7%降至48.3%。
上半年業績出色，是因為汽車及電訊產品業務蓬勃。手機需求上升，來自國內定單增加，精電為客戶提供多項解決方案，包括彩色STN及TFT彩色顯示屏，而物料成本維持在合理水平，集團得以保持滿意的邊際利潤。
■03年全年盈利預測1.55億元，增長40%，每股盈利由0.37元增至0.51元。現價7.65元，往績PE20.7倍，預測15倍。現時恒指逾12500，而精電的技術亦獲得肯定，PE15倍，未致偏高。
■精電未來增長，將來自汽車顯示屏與手機顯示屏。精電現正全面發展全彩色OLED顯示屏（二極管顯示屏），有信心到05年當OLED市場全面發展時，有能力生產具競爭力的產品。年初已與柯達在OLED的技術上達成專利協議，又與2BDDisplayLtd.合作發展「零電源」顯示屏，產品已陸續面世。未來數年，精電每年盈利有機會維持20%以上的增長。
■精電一直維持良好的財政狀況，今年6月底手上持有現金4.09億元，另有屬於證券的投資組合3.19億元，借貸微不足道。今年是精電開業25周年，除中期息7仙大增6成外，已派特別股0.21元。由於財政充裕，下次宣布末期業績時派發特別息慶祝創業四分一世紀的可能性存在。
■精電是基金的投資對象之一，摩根大通7月持有7.11%，9月中增至8.07%，至今再無增減。持有5%以下毋須呈報的基金，估計數在不少。
●精電是令人放心持有的科技股，但現時潮流，科技股並非焦點所在，可候低吸納，在7元邊緣上車，中線持有，目標價是10月頂部9元。
何車
住宅同舖位不時都聽到有炒賣，𠵱家連寫字樓都開始多咗短炒，尖沙嘴嘅新港中心，就啱啱錄到一宗短炒，唔使兩個月就賺咗七十三萬，都幾和味。
中原助理董事何淑貞話，呢個單位係五樓四室，得一千四百二十四呎，十月時投資者以三百九十五萬買入，近日就以四百六十八萬轉手，兩個月升值近一成九。
佢又透露，同區嘅康宏廣場九樓一室，一千一百五十八呎，十月尾成交價約三百七十萬，投資者喺完成交易前四日，以約三百九十四萬摸出，賺咗二十四萬。
除咗短炒之外，由於區內寫字樓造價回升，亦造就咗一批短期轉手獲利成交，好似新港中心一座九樓八室，面積一千四百二十四呎，舊年嘅買入價四百三十萬，𠵱家就以約四百五十萬賣咗，利潤都有約二十萬㗎。
工廈業主放售單位態度強硬，佢哋要買家畀到要求嘅價錢至肯成交。美聯營業經理羅國強話，大埔太平工業中心一座一個九千九百九十五呎C單位，買家最初出價每呎二百蚊，但業主就堅持要二百三，最後買家都要出到嗰個價至成交，價錢比八九月時嘅百零蚊高咗一大截。
而火炭華耀工業中心一個九千九百六十七呎單位，成交價就係原業主嘅開價二百五十萬，比市價高近一成四。
至於沙田新貿中心約五千二百呎銀主盤，買家喺一個月內五度追價，終以市價每呎六百二十四蚊買入自用。
投資者入市掃住宅嘅情況愈嚟愈多，甚至連單幢樓都唔放過，好似上環舊區嘅達隆名居，日前就有一個喺內地做生意嘅港人，用千五萬，買咗五伙收租。
美聯助理區域經理李嘉傑講，佢係外區客，之前睇過幾個新盤，新落成嘅單幢樓達隆名居，睇咗兩三次就扑槌。
呢五個單位都喺二十樓或以上，面積六百九十到七百零呎，兩房設計，區內較少有，重有露台同享海景。
李又透露，區內一名外籍租客，用三百二十萬，買入達隆名居一個高層七百二十二方呎A單位，月供計落平過交租。
本港經濟雖然話出現反彈，好多行業員工今年都有花紅分，但唔少僱主對明年嘅前景都有保留，好似豐滙銀行同恒生銀行就講明會繼續凍薪。不過，佢哋其實都算係不幸中之大幸，因為蘭西聽聞有啲行業仍要繼續減人工。
據聞最近有物業管理公司發信畀員工，話希望大家同公司共度難關喎，即係明年要再減人工，呢行嘅人工幾年前都係一萬蚊唔夠，減咗幾年重要再減，咁你話係咪好慘呢？
地產代理監管局早前新人上場之後，搞作多咗，除咗同代理商會代表上京，會晤當地建設部同統戰部等部門，噚日又再同代理商會開會，聽講內容係關於洗黑錢指引等業界關心嘅問題。
地監局遲吓可能會開記者會，有嘢公布，所以商會代表都好識做唔肯爆料；但從佢哋嘅反應嚟睇，應該係好消息。
蘭西
電郵地址：
