自由性別研究員
7.1在台上唱歌，其後參選區議會，擊敗民建聯對手
「有啲嘢冇咗好耐，突然返晒嚟，我講嘅係六四嘅豪情。7.1之後，乜嘢都變得有可能；唔好再話唔得、一定冇可能。7.1對我好大影響，身邊嘅人鼓勵我，叫我參加區議會選舉，我冇信心，佢哋叫我睇番7.1，冇試過點知唔得？結果贏咗。啲人話因為唔想選對方，唔係真係想選你，只不過你冇對方咁樣衰。」
私家醫生
7.1前發起醫生上街示威
「當時我哋都覺得有啲唔自在，醫生忽然將政治議題帶入業界，好多醫生都抗拒。但係我覺得，呢個係歷史時刻，應該企出嚟，既然立法會都有醫生一票，我哋作為醫生，都應該出聲。𠵱家睇番，覺得當時做得好啱，大家都係為香港。今日嘅政府已經多咗聽民意，中央政府推出一連串經濟措施，社會氣氛亦都好咗。」
香港記者協會主席
「有咁多記者出嚟遊行，係好稀有嘅事情。7.1前，新聞界要求政府唔好立法，新聞自由係社會重要基石，如果新聞被封鎖，人民就得唔到好多資料。我哋當時感到行業受威脅，23條立法對記者響起好大嘅警號，同業好不安。有人覺得做記者唔應該參與遊行，但係我哋係迫不得已，如果威脅到新聞自由，我哋都唔企出嚟保護，做記者做乜？」
中學生
7.1前號召全港學生參與遊行
「當日有五十萬人企出嚟表達意願，當初重以為只得十萬人，好驚喜。更加驚喜係，葉劉淑儀同梁錦松辭職，董建華撤回草案。當初出嚟遊行，只係諗住表達意願，估唔到有咁嘅結果。可惜董建華到𠵱家重係冇聽人民聲音，繼續拖延政制改革。無論如何，我都好開心，呢幾個月嚟，不停有學校邀請我哋講talk（演講），社會終於肯多啲聽年輕人嘅聲音。」
