噚日有個研究機構「中國城市競爭力研究會」，呢個研究今年新增一項「中國城市首腦風雲排行榜」，特區首領董建華名列十大之內，並獲得「最和藹的行政長官」美譽。中國城市競爭力研究會秘書長喬惠民解釋，除咗研究會內一批專家揀選，佢哋喺各大城市派咗二萬份問卷，收番九千份，其中香港就收到幾百份，被訪者根據首腦的施政水平、公眾形象，同市民滿意指數作評分。
唔係呀嘛？以呢三個指標評分，阿董居然可以晉身十大？喬惠民「點醒」八方，佢話所謂風雲榜，係不論好壞，只係衡量佢嘅影響力，咁阿董搞到五十萬人上街，影響又真係唔細嘅。喬惠民重話，由於該會嘅專家一定要對入選者作正面評價，所以為老董冠以「最和藹」之名囉。佢哋梗係冇睇過董生點樣嘴藐藐在立法會鬧民主派喇。不過話時話，比起六四時宣布戒嚴嘅李鵬，同埋大罵有線女記者張寶華「賴依芙」嘅江主席，董伯副尊容，叫做慈祥到不得了咯。
傳真︰2623-9278
電郵︰