【本報訊】梅艷芳曾與姚莉結台緣，當日姚莉在港台十大中文金曲頒獎禮上頒金針獎予名填詞人陳蝶衣，現場要求姚莉高歌一曲《情人的眼淚》，姚莉便邀請阿梅上台代她獻唱。
姚莉昨在電話中說：「雖然佢把聲好似男人咁好粗，唔算係靚，但係一開口就有佢風格同品味，佢初出道時我冇乜留意，但後來發覺佢愈唱愈好，好有藝術家氣質。有啲人話阿梅把聲似徐小鳳咁有磁性，但我覺得徐小鳳太過一本正經，唔及阿梅咁有魄力同活力，阿梅嘅歌令人覺得好有實在感，我最鍾意《似水流年》，今日聽《孤身走我路》都忍唔住喊出嚟。」
曾與梅艷芳於華星唱片共事的黎小田，對阿梅逝世感到惋惜，昨天他在新城電台說：「佢好鍾意去Disco，但跳跳吓會唔見咗佢，原來佢對住塊鏡睇自己舞姿。佢鍾意拍戲，我就幫佢同嘉禾電影公司傾，最初二十萬一套，到《黑心鬼》時阿梅話有一百萬片酬先拍，結果公司真係肯畀佢。而原本《IQ博士》主題曲係梅愛芳唱，後尾錄得唔好就搵咗阿梅，佢初時覺得首歌好怪，唔想唱，但我同佢講，點解唔吸納埋小朋友呢？」結果這首卡通片主題曲亦成為家喻戶曉之作。
