基金經理F請食飯，講到人人對二○○四年感到好樂觀，認為地產必升，美元必跌，黃金高處未算高。經濟增長快速，失業率下跌……總之一片好景。基金F反而覺得擔心，佢話：「當九成幾人都看好金股滙地產之餘，我就驚驚哋，是否應從壞處諗一諗，以免患上亢奮症，遇上突如奇來嘅大調整，就走都走唔切。」
洛克菲勒名言：當同你擦鞋嘅細路都講股票嘅時候，股市就會見頂。現在是否進入如斯境地，有排拗，好多聰明人都認為股市一定再上，唔似得基金F咁謹慎。如果睇《猴年問阿桂》，就知道桂姐卜卦，卦象對○四年嘅地產、股市都唔算係睇得好好，只係話上車之後要醒目落車啫。
順帶一提，唔少讀者來電郵問《猴年問阿桂》邊度有得賣？好易啫，問吓報紙攤檔就應該有㗎嘞，個多星期前，本書已經推出應市，大家冇理由買唔到嘅。
基金F從佢嘅多年投資經驗判斷，隱約覺得明年未必就係一帆風順，桂姐憑易經卜卦得知，明年有喜有凶。星期一與金融界老波骨見面，佢話明年有政治風險！佢從不同渠道聽到，北大人會在明年開始，唔對民主派客氣，要殺一殺民主派威風，唔好等佢哋喺立法會選舉時咁得戚。用乜手段方法呢？老波骨話唔知，總之投資之時，要留有餘地，方可應付唔知幾時爆發嘅政治震盪！