個子不高的樂壇新人鄭融極愛穿高踭鞋，除了補救身形不足之處外，她自言對高踭鞋亦有一種情意結，因為自小已看着母親打扮，令她覺得只要穿上一雙高踭鞋，便能令自己變得更成熟。
鄭融入行以來多以唱快歌為主，配合舞步在舞台上搖擺，因個子比較矮小，她通常會穿上高踭鞋來補救。不過鄭融表示她鍾情高踭鞋，主因還是從小到大受到母親的耳濡目染。
鄭融說：「我同好多女仔一樣，細個都鍾意偷偷試着媽咪嘅高踭鞋，覺得着咗呢種鞋就係大人嘅代表，所以我讀書時期去街都會着高踭鞋。好多人話着高踭鞋行路會辛苦，但我就覺得冇問題，而且高踭鞋嘅款式都靚啲啦！」
家中儲了二十多雙高踭鞋的鄭融，透露大部份珍藏都是「斗零踭」，更大談她對以高踭鞋配搭衣服的一套理論。鄭融說：「好多人都覺得着高踭鞋要襯得斯文啲，但其實唔係，我就最鍾意襯牛仔褲，特別係Fornarina嘅鞋款，可以襯得好型女，所以我屋企大部份鞋都係呢個牌子嘅。」
鄭融又表示在眾多高踭鞋中，其中一雙黑色粗踭鞋正是其「戰鞋」，她說：「呢對鞋係我入行之後買嘅第一對高踭鞋。當時我知公司想我跳舞，亦覺得我嘅高度着高踭鞋比較好，我都好擔心㗎，好彩俾我搵到呢對鞋。另外一對我都好鍾意，就係紅色嘅NineWest，因為上次無綫公益金騷要求班歌手有紅色嘅嘢喺身，我就買咗呢對鞋，後來都覺得好啱自己。」
採訪、攝影：蔡如玉
