「梅艷芳係我最欣賞嘅歌星，對佢嘅病逝感到非常惋惜同傷心，早喺八二年我做深水埗專員時，已請佢舉辦演唱會。最欣賞嘅歌曲係《似水流年》同《胭脂扣》主題曲。」
經濟發展及勞工局局長葉澍堃
「六四之後，梅艷芳積極參與支援中國同海外嘅民運機構，唱歌為佢哋籌款。雖然曾經因此唔返得內地，佢仍堅持一段相當長嘅日子，一個藝人有咁嘅情操，非常令人尊敬。」
支聯會常委張文光
「我小學時已經喺電視度聽過梅艷芳唱嘅《I.Q.博士》，嗰時唔知邊個唱，已經覺得佢唱得好過癮，不過佢同一般香港歌手唔同，形象百變好似外國歌手。」
市民張先生（售貨員）
「英年早逝，好可惜。作為癌病過來人，我覺得梅艷芳對抗頑疾嘅態度好樂觀、勇敢、堅強，呢種精神好值得稱讚。」
立法會主席范徐麗泰
「損失咗一個勁人，佢好堅強，肯公開出嚟對大家講自己嘅病。我最欣賞佢好樂意幫人嘅性格，好似當年華東水災咁，佢都有發起籌款。」
市民黃女士
「今早聽到梅艷芳病逝消息感到好愕然，佢係一位十分出色嘅藝人，對朋友熱誠，對公益事業更不遺餘力，對於佢突然去世，大家感到十分可惜，最喜歡嘅歌曲係《似水流年》同《蔓珠莎華》。」
民政事務局局長何志平
「真係好可惜，佢一生係傳奇，唱歌有實力，點似𠵱家啲歌星有個樣就以為得，我諗唔會有第二個梅艷芳出現，冇人可以取代佢。」
市民梅先生
「我早前已經到過醫院探望阿梅，前日是劉培基通知我去醫院見梅艷芳最後一面。梅艷芳離世前，佢最親近嘅人同朋友都喺身邊，可以話走得好安詳。」
前廣播處處長張敏儀
「我係佢嘅歌迷，印象最深刻係佢唱《壞女孩》時，台風好犀利，跳舞又勁。佢喺逆境中仍好積極、堅持自己，令人佩服。」
市民林小姐（留美學生）
「八月我同梅艷芳喺『抗SARS傑出獎選舉』一齊攞獎，佢好認真咁問我，SARS爆發係咪因為生化戰。我覺得佢好關心沙士，好關心社會。」
醫學會會長勞永樂
