港股一度升180點，但午後消息證實廣州嗰單九成九係沙士，行情由高位回落，不過，承接力仍好強，噚日則輪到電訊同地產股有好表現，恒指收市12526，升62點，成交增至219億元，唔計本月16日中銀（2388）配售嗰日，成交終於創出今年新高。
成交新高，大市起碼重有一段長時間好景，04年第一季，大中細股將會百花齊放。國企指數「咋咋聲」上到4900水平，3隻重磅股都見基金繼續大手吸納，中石油（857）升6.1%；中石化（386）升7.3%；中電信（728）升4.3%。3隻熱炒新股早段繼續搶高，國壽（2628）終於升破7元大關，升逾10%；人保財險（2328）升9.5%；紫金（2899）亦進帳7%，但獲利貨太多，午後市勢逆轉，股價亦大幅回落，由於累積升幅太大，短期調整好合理，照計就未升完，吼低位可以再炒過。
兩隻大石油股係咁舞上去，有大芬揸住隻中國（香港）石油（135），重好似未收夠貨，咁有耐性，一有動作，升幅肯定唔會細。中油噚日最高去到1.31元，但回收1.25元，跌1仙。
相比兩大油股，中油明顯大落後，就睇呢個月（噚日收市價比11月底收市），中石油升幅係50.4%，中石化升36.0%，而中油則只升得12.6%。中油盈利增長好勁，冇理由落後咁遠。
03年度（12月年結）的上半年，中油業績靚靚，營業額11億元，升50.8%，賺3.1億元，升96%，每股盈利6.48仙。下半年，公司已表示平均實現油價上升，而產量又增加，估計全年盈利可上升到6.5億元，每股盈利13.7仙。中油今年在海外進行了多宗收購，已變身成為跨國石油公司，以12倍PE計，股價已可見1.64元。
最近半個月，中油走勢形成大型三角形，噚日去到頂部（1.3元）受阻而回，但基金一郁手，就會破位而上，以量度升幅計，最少可升到1.55元。
遠東發展（035）升14.1%，高收1.61元，本月8號本欄推介買入，當時股價1.08元，第二春果然出現，中線仍可持有。
郭兆誠