梅艷芳逝世，終年只得四十。喺呢個荒謬嘅特區，贏得一片噓聲兼冇本事嘅人，賴死喺度唔死，贏得好多掌聲嘅，就一個個咁死，真係唔知咩嘢世界。
《胭脂扣》兩名主角，哥哥張國榮同梅艷芳，唔經唔覺都已經撒手塵寰。佢哋兩個去咗另一個境界。嗰度冇負資產，冇人失業，冇迫人拍戲唔找尾期嘅黑社會，哥哥同阿妹，可以日日合唱仙曲，希望他倆在天之靈，可以開心安樂！香港人再也聽唔到歌壇上哥哥同阿妹嘅聲音，相反，喺呢個特區人間嘅城市論壇，就久唔久被迫要聽鄔維庸、劉佩瓊呢一類親中金童肉女侮辱香港人嘅噪音。哥哥同妹妹嗰一雙離開咗我們嘞，鄔同瓊呢一對仍然生勾勾活着。鄔維庸話：七月一日五十萬人大遊行，唔代表香港人有質素，而劉佩瓊就話：香港人嘅民智太低，未夠班搞民主普選！
遙想梅艷芳，喺一九八九年六四之後，就領導過全體演藝人，會同百萬港人，喺跑馬地，搞咗個「民主歌聲獻中華」嘅音樂會，雖然佢嘅呼聲，係相當短暫，礙於黑勢力橫行，後來暫時收咗聲，但相信阿梅生前嘅心願之一，就係民主嘅光輝，有一日可以普照大地！
點樣去更有意義地紀念梅艷芳生前嘅功績？莫如繼承梅艷芳八九年六四期間嘅民主精神，香港人齊齊喺明日，即是二○○四年元旦，用腳步聲，去齊齊紀念梅艷芳生前做過嘅呢件最有意義嘅事。
七一遊行之前，阿董多次污辱香港人，沙士調查，強有得撈，阿松偷步買車就高尚情Lo
正如葉劉話齋，上街遊行有好多目的，唔一定係為咗反廿三。冇錯，元旦市民大步行，今次絕對唔係反廿三，而係為咗紀念梅艷芳「民主歌聲獻中華」精神，為咗刺激鄔維庸劉佩瓊之類嘅大腦神經，又或者為咗慶祝吓民建聯學利比亞咁改邪歸正（明明民建聯係做戲，大家都可以齊齊做戲啫），又或者慶祝欣宜成功減肥七十磅獲得新生（希望胡溫都回應港人心聲，速速切除阿董呢嚿多餘嘅脂肪瘤包袱），頭一行，畀馬力、陳婉嫻、葉國謙等反董義士，總之開開心心，各有各目的而行，強身健吓體，係咁意熱吓身，準備九月立法會選舉街頭選票箱再見！
傳真︰2623-9278
電郵︰