美男士最想陪邊個倒數？
安琪蓮娜大除夕萬人等約

荷李活女星安琪蓮娜祖莉（AngelinaJolie）為養子麥度斯（Maddox）嘅問題近日好煩惱，但佢睇完百視達啱啱公布嘅調查結果，都應該會覺得開心，因為呢個美國男士最想喺大除夕約會女性選舉，安琪蓮娜輕鬆勝出，證明佢魅力非凡。

嘉芙蓮第二
百視達上個月十一至二十四號，向接近三萬二千人進行調查，前日公布嘅結果顯示安琪蓮娜以三十五個巴仙支持率榮登榜首，第二位就係威爾斯女星嘉芙蓮薛達鍾絲（CatherineZeta-Jones）。
安琪蓮娜早排接受訪問，曾經講過佢已經好耐冇愛情滋潤，想搵番個伴侶咁話，相信佢知道原來有咁多男士想喺大除夕date佢，睇嚟佢都唔使咁急，可以睇定啲慢慢揀。

性感有優勢
其實呢個調查除咗有問啲男士，亦都有問女士，結果原來最多女士想喺大除夕約會嘅男性，係二十五歲嘅艾斯頓古查（AshtonKutcher），而屈居喺艾斯頓之後嘅係今年獲《People》雜誌選為全球最性感男士嘅尊尼狄普（JohnnyDepp），可見佢嘅吸引力的確有番咁上下。